ISITHUBA SENTELA SABATHENGISI BENTELANTENGO

Yiziphi izithuba zentela ezikhona zeNtelantengo?

• Isigaba A

• Ngaphansi kwalesi sigaba, umthengisi kudingeka alethe imbuyiselo eyodwa njalo ezinyangeni ezimbili zekhalenda, kuze kube lusuku lokugcina lukaMasingana, lukaNdasa, lukaNhlaba, lukaNtulikazi, lukaMandulo nolukaLwezi.
• UKhomishana uzonquma ukuthi umthengisi uyangena yini kulesi sigaba.

• Isigaba B

• Ngaphansi kwalesi sigaba, umthengisi kudingeka alethe imbuyiselo eyodwa njalo ezinyangeni ezimbili zekhalenda, kuze kube lusuku lokugcina lukaNhlolanja, lukaMbasa, lukaNhlangulana, lukaNcwaba, lukaMfumfu nolukaZibandlela.
• UKhomishana uzonquma ukuthi umthengisi uyangena yini kulesi sigaba.

• Isigaba C

• Ngaphansi kwalesi sigaba, umthengisi kudingeka ukuba alethe imbuyiselo eyodwa njalo ngenyanga.
• Umthengisi ungena phansi kwalesi sigaba uma:
• inani lesamba sempahla ethelayo ayenzile idlule noma ingase yedlule ku-R30 million noma kunini ezinyangeni ezili-12  ezilandelanayo,
• umthengisi ecele ngokusibhalela ukuba afakwe kulesi sigaba, kumbe
• umthengisi ubeyilokhu ehluleka ukulandela imigomo edingekayo yemithetho yeNtelantengo.

• Isigaba D

• Ngaphansi kwalesi sigaba, umthengisi uletha imbuyiselo eyodwa ezinyangeni eziyisithupha zekhalenda, okuba ngosuku lokugcina lukaNhlolanja nolukaNcwaba.
• Lesi sigaba sizosebenza kumthengisi-
• owenza imisebenzi yokulima, lapho isamba esiphelele sempahla yakhe singaphansi kuka-R1.5 million esikhathini esiyizinyanga ezili-12,
• eyibhizinisi elincane elibhaliswe ngokweSheduli Lesithupha kuMthetho Wentelangeniso.

• Isigaba E

• Ngaphansi kwalesi sigaba, umthengisi kudingeka alethe imbuyiselo njalo ezinyangeni ezilishumi nambili zekhalenda, okuvala ngosuku lokugcina lonyaka wokubuyekezwa womthengisi
• Lesi sigaba sisebenza kumthengisi oyinkampani noma isikhwama  seqomangcebo. Uhlelo olwengeziwe, ukuze ungene kulesi sigaba, lubekwe kwiSahluko 3 somhlahlandlela i-VAT 404.